ERRESPETA EZAZUE ETA ERRESPETA DEZAGUN GURE DENBORA
Epaia berria:
Duela gutxi, Galiziako Justizia Auzitegi Nagusiko (TSXG) Lan Arloko Salak argi utzi du berriro ere zein garrantzitsua den eskubide hori. Horren froga da enpresa bat kondenatu dutela langile bati 1.500 euro ordaintzera lanorduz kanpo mezu elektronikoak bidaltzeagatik, bajan egotearen larrigarriarekin.
TSXGk gogorarazten digu Deskonexio Digitalerako Eskubideak eskatzen duela langileok enpresaren komunikaziorik ez jasotzea gure lanordutik kanpo.
Hau da, ez da nahikoa mezu horiei unean bertan ez erantzun ahal izatea; aitzitik, enpresak, eta bertan lan egiten duen edo harekin nolabaiteko lotura duen edonork, gure lanorduz kanpo laneko komunikaziorik EZ bidaltzeko betebeharra du.
Epai honek argi uzten du enpresak gure atseden-denbora eta bizitza pertsonala errespetatzeko duen betebeharra.
CCOOk aspalditik ohartarazi dio EHU/UPVri legea bete behar duela eta sindikatuekin Deskonexio Digitalerako Eskubidea bermatuko duen araudi bat negoziatu behar duela.
Hala ere, badirudi hori ez dela lehentasuna errektoretza-talde batentzat; izan ere, nahiz eta ahal duen guztietan eta komunikabideen aurrean pertsonen zaintzarekin duen konpromisoaz harrotu, praktikan ez du ezer egiten. [1]
Bajan egonda lan egitea:
Epai horretatik haratago, EHU/UPVko langile guztiei, IRI zein AZPkoei, gogorarazi eta ohartarazi nahi diegu bajan gauden bitartean ezin dugula lanik egin.
Praktika arrunta da, borondate onetik eta arduraren zentzu gaizki ulertu batetik sortzen dena, askotan, gure lankideei "gure ardurak" ez kargatzeko helburuarekin.
Hala ere, ulertu behar dugu praktika hori Gizarte Segurantzarekiko iruzurra dela eta dagokigun subsidiorako eskubidea ukatu, baliogabetu edo eten daitekeela, onuradun gisa, aldi horretan lan egiten badugu.
Eta, jakina, bajan egonda lanik ez egiteko betebehar hori ez da gure lanpostuan egotera mugatzen, enpresaren eta/edo erakundearen lan-arloko komunikazio posibleei arreta ematera ere hedatzen da.
Aldi Baterako Ezintasunaren (baja) helburua, hain zuzen ere, pertsonaren osasuna berreskuratzea da, eta, beraz, ezin da lanik egin.
Oporretan lan egitea:
Ordaindutako urteko oporrak nahitaezko eta uko egin ezineko atsedenaldia dira, langilea atseden hartzeko eta suspertzeko. Beraz, ez da onartzen inolako lan-jarduerarik egitea, enpresaren komunikazioei arreta ematea barne. Salbuespenez, atsedenaldi hori eten behar izanez gero, baimen berezi bat eskatu behar da, eta horrek, aldi berean, ondorengo konpentsazioa ekarriko luke.
Azpimarratu nahi dugu oporretan Deskonexio Digitalerako Eskubideak indarrean jarraitzen duela. Enpresak bermatu behar du oporretan komunikaziorik ez jasotzea, gure lan-jardueraren etenaldi eraginkorra izan dadin eta suspertzeko eta atseden hartzeko aukera izan dezagun.
Aldi Baterako Ezintasunekin (baja) gertatzen den bezala, oporretan lan-jarduera bat egiteak aldi horien helburuaren aurka egiten du eta legezko ondorioak edo prestazioekiko ondorioak ere izan ditzake.
Egin ditzagun gauzak ondo eta, atseden hartzea tokatzen denean, atseden har dezagun.
¡CCOO, EHU/UPVko langileen defentsan!
ccooupv-bi@ehu.eus
iruzkinik ez:
Argitaratu iruzkina